ᓄᓇᓕᒃ

ᑐᓵᔪᒍᑦ ᐃᓕᖕᓂᒃ

ᐊᕇᕙ-ᑯᑦ ᐃᓕᑦᑎᓚᐅᖅᑐᑦ ᐊᖏᔪᒥᒃ ᐅᖃᖃᑎᖃᖃᑦᑕᕐᓂᒃᑯᑦ ᐃᓄᖕᓂᒃ ᓄᓇᓕᖕᓂᒃ 7-ᖑᔪᓂᒃ ᑭᕙᓪᓕᕐᒥᑦ. ᐊᒥᓱᐃᖅᑕᖅᖢᑕ ᐅᒃᑯᐃᖓᑎᑦᑎᓂᒃᑯᑦ ᖃᐃᖁᔨᓂᒃᑯᑦ ᐊᒻᒪᓗ ᑲᑎᒪᑎᑦᑎᓂᒃᑯᑦ ᐃᓐᓇᕆᔭᐅᔪᓂᒃ, ᒪᖃᐃᖅᑎᓂᒃ, ᑮᔭᖅᑲᑦᑎᐊᖅᑎᓂᒃ, ᐃᓇᖐᖅᑲᑦᑕᖅᖢᑎᒃ ᐱᓕᕆᔨᓂᒃ ᐊᒻᒪᓗ ᐱᖃᑎᒋᔭᖏᓐᓂᒃ, ᒪᒃᑯᒃᑐᕐᔪᐊᓂᒃ ᐊᒻᒪᓗ ᐊᕐᓇᓂᒃ. ᐊᕇᕙ-ᑯᑦᑕᐅᖅ ᐃᓄᖕᓂᒃ ᑭᕙᓪᓕᕐᒥᐅᑕᓂᒃ ᓴᔅᑳᑦᓱᐊᓐ ᐅᐊᖕᓇᖓᓄᖅᐸᓯᐊᓄᙵᐅᔾᔨᓚᐅᕐᒥᔪᑦ ᑕᑯᖁᑉᓗᒋᑦ ᓄᖑᓱᐃᑦᑐᒥᒃ ᐊᐅᓚᑎᑦᑎᓂᐅᔪᓂᒃ ᖃᐅᔨᒃᑲᓐᓂᖁᑉᓗᒋᑦ ᖃᓄᖅ ᐅᔭᕋᒃᑕᕆᐊᑦ ᐊᐅᓚᖃᑦᑕᕐᓂᖏᓐᓂᒃ, ᖃᓄᐃᖃᑦᑕᕐᒪᖔᑦ ᐅᔭᕋᒃᑕᕆᐊᖅ ᐅᑎᖅᑎᑕᐅᔭᕌᖓᑦ ᐋᓐᓂᖅᑕᐃᓕᒪᓂᒃᑯᑦ, ᐃᓕᑦᑎᖁᒧᑦ ᐊᑐᖅᑕᐅᔪᓄᑦ ᐊᒻᒪᓗ ᐅᖃᖃᑎᖃᕐᓂᕐᒥᒃ ᐱᕕᖃᖅᑎᓐᓂᕐᒧᑦ ᓄᓇᓕᖕᒥᐅᑕᐅᔪᓂᒃ ᐅᔭᕋᒃᑕᕆᐊᑉ ᖃᓂᑕᖓᓂᒃ ᓄᓇᓕᖕᓄᑦ.

ᐅᖃᖃᑎᖃᖅᖢᓂ ᓄᓇᓕᖕᒥᐅᓂᒃ ᐃᑲᔪᐃᓂᖃᓚᐅᖅᑐᖅ ᐊᕇᕙ-ᑯᓐᓂᑦ ᐊᑐᖅᐸᓪᓕᐊᓂᐊᖅᑐᓂᒃ ᐸᕐᓇᒍᑎᒥᒃ ᑭᒡᒐᕕᒃ ᐱᓕᕆᐊᒧᑦ, ᐊᒻᒪᓗ ᑐᓴᕈᒪᑉᓗᑎᒃ ᐃᓱᒫᓘᑕᐅᔪᓂᒃ ᐱᒻᒪᕆᐅᒋᔭᖏᓐᓂᒃ ᑭᕙᓪᓕᕐᒥᐅᓂᑦ ᓄᓇᓕᖕᓄᑦ. ᑐᑭᓯᐅᒪᔾᔪᑎ ᐃᑲᔪᐃᓂᖃᓚᐅᖅᑐᖅ ᐊᕇᕙ-ᑯᑦ ᓴᖅᑭᑦᑎᓂᕐᒥᒃ ᐱᓕᕆᐊᒥᒃ ᐃᑲᔪᐃᓂᖃᕐᓂᐊᖅᑐᒥᒃ ᐱᕈᖅᑎᓐᓂᕐᒥᒃ ᐆᒻᒪᕆᒃᓴᕐᓂᖃᑦᑎᐊᖅᑐᓂᒃ ᑭᕙᓪᓕᕐᒥᑦ ᓄᓇᓕᐅᔪᓂᒃ.